Alþjóðlegi Skólamjólkurdagurinn
Alþjóðlegi skólamjólkurdagurinn er haldinn hátíðlegur síðasta miðvikudag í september ár hvert af undirlagi Matvælastofnunar Sameinuðu þjóðanna, FAO.
Í liðlega 30 löndum ( Afganistan, Argentína, Austurríki, Bretland, Eþíópía, Filippseyjar, Finnland, Frakkland, Guyana, Indland, Indónesía, Íran, Ísland, Jamaíka, Kanada, Kenýa, Kína, Kosta Ríka, Kýpur, Malasía, Mexíkó, Noregur, Oman, Pólland, Saudí Arabía, Senegal, Sviss, Svíþjóð, Taíland, Tékkland, USA og Þýskaland ) var haldið upp á daginn og var Ísland eitt þeirra.
Sífellt fleiri stjórnvöld í löndum heimsins eru að vakna til vitundar um mikilvægi mjólkurneyslu barna og unglinga í skólum. Mjólk er próteinrík og auk þess mikilvæg uppspretta nauðsynlegra vítamína og steinefna í fæðunni. Mjólk með nestisbitanum og hádegismatnum gerir máltíðina fullkomna. Nánast engar máltíðir, án mjólkur eða mjólkurvara, duga til að fullnægja þörf okkar fyrir öll þau næringarefni sem líkaminn þarfnast. Sérstaða mjólkur felst þó fyrst og fremst í því hve góður kalkgjafi hún er og kalk er mikilvægt fyrir byggingu beina. Vart er því hægt að hugsa sér betri og næringarríkari drykk en mjólk til að gefa börnum og unglingum og því full ástæða til að hvetja þau til aukinnar mjólkurneyslu.
Í flestum löndum er hart sótt að mjólkinni. Má þar nefna safa, djús og gosdrykki. Sumar þjóðir hafa til mótvægis þessari óheillaþróun gripið til þess ráðs að banna sölu og neyslu slíkra drykkja í skólum. Aðrar þjóðir gefa skólabörnunum mjólkina.
Nemendum grunnskóla í 65 löndum heimsins stendur til boða skólamjólk af einhverju tagi. Fyrirkomulag skólamjólkurmála er með ýmsum hætti enda eru allar aðstæður í löndunum mjög mismunandi. Sænsk börn neyta til dæmis 1,8 dl. mjólkur á dag í skólanum, en íslensk börn aðeins 0,8 dl. Í Svíþjóð hefur neyslan aukist um 50% á 10 árum. Markaðsnefnd Mjólkuriðnaðarins hefur sett sér það markmið, ekki síst í ljósi niðurstaðna í neyslukönnun 2002, að neysla íslenskra skólabarna aukist um 100% næstu fimm árin, í 1,6 dl. að meðaltali á hvert skólabarn.
