Hvernig

Markaðsnefnd Mjólkuriðnaðarins stóð fyrir þátttöku Íslands í hátíðarhöldunum vegna alþjóðlega skólamjólkurdagsins.

Fjölmargt var gert í tilefni dagsins

Grunnskólabörn eru rúmlega 45.000 í 200 skólum landsins. Mjólkuriðnaðurinn gaf öllum grunnskólabörnum landsins mjólk. Í verkefnið fóru liðlega 12.000 lítrar af nýmjólk, léttmjólk og Dreitli í öllum gerðum umbúða, ¼ l fernum, stærri fernum eða 10 lítra kössum, allt eftir vali skólanna. Mikill fjöldi fólks kom að verkefninu, úthringifólk, starfsmenn kæla, bílstjórar og loks naut iðnaðurinn gífurlegs velvilja skólastjórnenda og starfsmanna skólanna við að dreifa þessum aukaskammti af mjólk, kælitöskum og póstkortum til nemendanna.

Öllum grunnskólum voru færðar sérstakar kælitöskur, sem ætlaðar eru utan um mjólkina í ¼ l fernum, frá geymslustað hennar í skólanum til kennslustofu. Um helmingur allra bekkjardeilda skólanna notar töskuna eða liðlega 2.000. Er þar einkum um yngri bekkina að ræða, en sem kunnugt er þá eru yngri börnin duglegri við mjólkurneysluna en þau eldri. Þess má geta að vaxandi fjöldi skóla kýs að nota mjólk úr 10 lítra kössum í stað hefðbundnu fernunnar.

Öll börnin fengu afhent póstkort og stuttan texta, þar sem fjallað var um hollustu mjólkur og hversu heppileg hún er til drykkjar með nesti og mat.

Menntamálaráðherra tók þátt í leik skólabarna á Alþjóðlega Skólamjólkurdeginum

Mikið líf var í skólum landsins þar sem börn héldu uppá Skólamjólkurdaginn. Þorgerður Katrín Gunnarsdóttir, menntamálaráðherra, kom við í Ísaksskóla á leið sinni í ráðuneytið og tók þátt í leik barnanna þar.

Í tilefni dagsins fengu börnin fría mjólk og farið var í nýjan fjörugan ratleik sem saminn var af Íþróttakennarasambandi Íslands í tilefni dagsins.