Hvers vegna skólamjólkurdagur

Markaðsnefnd mjólkuriðnaðarins hefur markað sér stefnu varðandi mjólk og mjólkurneyslu í leik- og grunnskólum landsins til að bregðast við þeirri þróun sem blasir við varðandi neyslu barna og unglinga á mjólk.

Sú staðreynd að íslensk grunnskólabörn drekka að meðaltali á dag aðeins um 0,8 dl af mjólk á skólatíma, sem lesa má úr sölutölum mjólkurfyrirtækjanna, og ekki síður niðurstöður úr landskönnun á mataræði sem Manneldisráð lét framkvæma á árinu 2002 kalla á markvissar aðgerðir. Í könnun Manneldisráðs kemur fram að mjólkurneysla hefur stórlega dregist saman og er ástandið hvað alvarlegast þegar neysla hjá unglings stúlkum er skoðuð. Hjá þeim er ástandið orðið svo slæmt að þær ná ekki lengur ráðlögðum dagskammti af kalki, en mjólkin er okkar lang mikilvægasti kalkgjafi.

Skólamjólkurstefna

Meginmarkmiðið er að tryggja að neysla mjólkur í leik- og grunnskólum landsins sé í samræmi við manneldismarkmið á Íslandi. Þannig verði tryggt að öll börn á leik- og grunnskólaaldri hafi greiðan aðgang að mjólk á matmálstímum í skólum.

Með þessu hyggst mjólkuriðnaðurinn leggja sitt að mörkum til að festa í sessi heilbrigðar neysluvenjur ungmenna á skólaaldri og tryggja jafnframt neyslu þeirra á mjólk síðar á lífsleiðinni.

Þátttaka í alþjóðlega skólamjólkurdeginum er liður í að framfylgja markaðri stefnu markaðsnefndarinnar. Deginum er fyrst og fremst ætlað að vekja athygli á mikilvæg mjólkur í næringu barna og unglinga og um leið að styrkja samskipti og samvinnu mjólkuriðnaðarins við þá fjölmörgu aðila sem vinna með heill barna á einhvern hátt.

Í tilefni dagsins var öllum grunnskólabörnum gefin mjólk og öllum skólum sendar sérstakar kælitöskur, ein fyrir hverja bekkjardeild, til að tryggja að börnin fái mjólkina sína kalda. Einmitt það að mjólkin væri ekki nógu köld er ein algengasta skýring sem gefin er á lítilli neyslu í skólum þegar rætt er við börnin, foreldra eða skólafólk.

Markmið um neyslu

Með framkvæmd skólamjólkurstefnunnar hefur verið sett það markmið að neysla á mjólk í skólum verði tvöfölduð á næstu fimm árum og verði þannig um 1,6 dl á dag að meðaltali. Til samanburðar má nefna að í Svíþjóð er meðalneysla nú 1,8 dl, en þar í landi hefur tekist með samstilltu átaki að auka neysluna úr 1,2 dl á nokkurra ára tímabili.

Það er von mín að þessi fyrsti skólamjólkurdagur á Íslandi sé heillaspor og aðeins fyrsti áfangi í baráttunni fyrir hollara mataræði barna og unglinga. Draumurinn er að sjá að á komandi árum verði litið á mjólkurdrykkju í grunnskólum sem svo mikilvægan þátt í mataræði barna og unglinga að ráðamenn þjóðarinnar sjái ástæðu til að tryggja þeim aðgang að ókeypis mjólk í skólum eins og þegar er orðin staðreyndi í nokkrum löndum.